Að minnsta kosti 130 manns voru handteknir í mótmælum í Moskvu í Rússlandi, þeirra á meðal er Alexei Navalny, einn af leiðtogum stjórnarandstöðunnar í landinu. Þúsundir hafa tekið þátt í mótmælunum í fjölmörgum borgum Rússlands sem beinast gegn spillingu ríkisstjórnar landsins.
Lögreglan notaði piparúða til að uppræta mótmælin og handtók fjölda manns í Moskvu.
Þegar Navalny var handtekinn gerðu mótmælendur aðsúg að lögreglunni og kröfðust þess að honum yrði sleppt. „Það er í lagi með mig. Ekki reyna að berjast fyrir mig,“ sagði Navalny í Twitter-færslu eftir að hann var handtekinn. Hann hvatti jafnframt mótmælendur til að halda áfram að berjast gegn spilltri ríkisstjórn landsins því það væri aðalmálið.
Russian opposition leader Alexei Navalny arrested in Moscow at anti-corruption protest he organised, witnesses say https://t.co/8BRrhaNoFl
— BBC Breaking News (@BBCBreaking) March 26, 2017
Navalny er einn helsti gagnrýnandi Vladimir Pútín Rússlandsforseta. Þetta er ekki í fyrsta skipti sem hann kemst í kast við lögin eða er handtekinn vegna mótmæla eða skipulagningar á þeim.
Á næsta ári ætlar Navalny að bjóða sig fram til forseta. Það gæti reynst erfitt því hann var dæmdur í fimm ára skilorðsbundið fangelsi fyrir fjárdrátt í febrúar á þessu ári. Navalny neitar hins vegar sakargiftum og heitir því að bjóða sig fram þrátt fyrir dóminn.
Uppfært kl. 16:15
Að minnst kosti hafa verið yfir 700 manns handteknir vegna mótmælanna í Moskvu.