Flugmaður lést í lendingu

Vél frá American Airlines á flugi.
Vél frá American Airlines á flugi. AFP

Aðstoðarflugstjóri þotu flugfélagsins American Airlines lést er vélin var að lenda á flugvelli í  Albuquerque í Nýju-Mexíkó  í gær.

Skömmu fyrir lendingu tilkynnti flugstjóri vélarinnar um neyðarástand um borð vegna veikinda, að sögn talsmanns flugumferðarstjórnar.

Lenda tókst vélinni heilu og höldnu og tóku bráðaliðar á móti henni á flugvellinum. Lífgunartilraunir voru reyndar en maðurinn var síðar úrskurðaður látinn.

Vélin var af gerðinni Boeing 737-800. Í frétt CNN segir að einn flugmaður geti lent slíkum vélum en slíkt auki þó álag á flugstjórann.

Atvik sem þessi eru óalgeng, að því ver fram kemur í frétt CNN.

mbl.is
Fleira áhugavert
Fleira áhugavert