Átök á jörðu niðri og loftárásir í suðvesturhluta Jemen urðu meira en fjörutíu að bana, þar á meðal óbreyttum borgurum, á einum sólarhring.
Orrustuþotur bandamanna, með Sádi-Araba í broddi fylkingar, hafa gert ítrekaðar árásir á bækistöðvar uppreisnarmanna Húta austur af hafnarborginni Mokha frá því í gær.
Í kjölfar loftárásanna brutust út átök á jörðu niðri. Að minnsta kosti sautján uppreisnarmenn létust í árásunum, aðallega í borginni Hodeida.
Bandalagsríkin, sem styðja forseta landsins, segja að Hodeida og nágrenni verði skotmörk herja þeirra á næstunni. Vonast þau til að ná þannig völdum á landssvæðinu frá uppreisnarmönnum sem þeir segja Írana styðja við bakið á, m.a. með því að útvega vopn.
Þá voru ellefu uppreisnarmenn felldir í loftárásum á Kamaran-eyju í Rauðahafi. Tíu hermenn stjórnarhersins létust og fimmtán særðust.
Þá létust þrír óbreyttir borgarar á árásunum og tveir voru særðir í borginni Daleh.
Styrjöldin í Jemen hefur nú staðið í tvö ár en þá hófu bandalagsríkin afskipti af borgarastyrjöldinni í landinu. Styðja ríkin Abedrabbo Mansour Hadi forseta sem var um tíma í útlegð vegna þrýstings frá uppreisnarmönnum.
Sameinuðu þjóðirnar telja að meira en 7.700 manns hafi fallið í átökunum frá upphafi stríðsins.
Hungursneyð vofir yfir Jemenum en allir innviðir landsins, svo sem fjarskipti, samgöngur og heilbrigðisþjónusta, riða til falls.