Átök gætu brotist út á hverri stundu vegna Norður-Kóreu en það mun enginn standa uppi sem sigurvegari í því stríði, segir utanríkisráðherra Kína. Ummælin lét Wang Yi falla í kjölfar þess að Donald Trump Bandaríkjaforseti sagði Norður-Kóreu „vandamál“ sem yrði leyst.
Wang sagði spennuna hafa magnast undanfarið, með Bandaríkin og Kína öðrum megin við borðið og Norður-Kóreu hinum megin. Sagðist hann hafa það á tilfinningunni að átök gætu brotist út hvenær sem er.
„Ef til stríðs kemur verður niðurstaðan ástand þar sem allir tapa og það verður enginn sigurvegari,“ sagði ráðherrann á blaðamannafundi með kollega sínum frá Frakklandi, Jean-Marc Ayrault.
Wang sagði að hvor aðilinn sem yrði þess valdandi að átök brytust út þyrfti að axla „hina sögulegu ábyrgð“ og gjalda fyrir.
Einn ráðgjafa Trump í utanríkismálum sagði í dag að Bandaríkjamenn ynnu að því að meta hernaðarvalkosti vegna kjarnorkubrölts Norður-Kóreu. Sagði hann að spurningin væri ekki hvort ríkið myndi sprengja aðra tilraunasprengju heldur hvenær.
„Viðræður eru eina mögulega lausnin,“ sagði Wang.