Meðal þeirra sem létust í sjálfsmorðssprengjuárásinni sem gerð var á rútur sem voru að flytja fólk á brott frá tveimur stríðshrjáðum bæjum í Sýrlandi í gær voru 68 börn. Heildarfjöldi þeirra sem eru látnir eftir sprengjuna er kominn upp í 126 manns, en 109 þeirra voru almennir borgarar sem ætluðu að flýja bæina.
Fólkið var í rútum á skiptistöð þar sem átti að flytja það í burtu frá bæjunum Fuaa og Kafraya, en herlið stjórnarhersins situr um bæina. Gert hafði verið samkomulag milli ríkisstjórnarinnar og uppreisnarmanna um að leyfa fólkinu að fara á brott.
Hundruð til viðbótar eru særðir og segir í tilkynningu frá sýrlenskum mannúðarsamtökum að tala látinna kunni að hækka.
Fuaa og Kafraya hafa verið undir stjórn uppreisnarmanna undanfarin tvö ár. Nokkrir tugir rúta náðu að yfirgefa bæina með almenna borgara þrátt fyrir árásina, en óljóst er hvort flutningunum verður haldið áfram í kjölfar árásarinnar.