Tveir þeirra sem handteknir hafa verið á Spáni, grunaðir um að tengjast hryðjuverkaárásunum í Brussel á síðasta ári, hafa viðurkennt að hafa verið á flugvellinum þegar að tveir menn sprengdu sig þar í loft upp. 17 létust á flugvellinum og tugir særðust. Mennirnir neita þó að tengjast árásinni.
Spænska lögreglan greindi frá því á þriðjudaginn að hún hefði handtekið 9 menn og gert húsleit á 12 stöðum í Barcelona í aðgerðum gegn íslömskum vígamönnum sem taldir eru tengjast árásunum í Brussel. Aðgerðin var unnin í samstarfi við lögregluyfirvöld í Belgíu og Marokkó.
Þá var greint frá því að hið minnsta þrír þeirra sem voru handteknir væru taldir tengjast hryðjuverkaárásunum á flugvöllinn og neðanjarðarlestarstöð í Brussel í mars í fyrra, sem kostuðu 31 manns lífið.
Átta mannanna eru marokkóskir en einn spænskur og eru þeir allir á fertugsaldri. Flestir þeirra eru sagðir vera nú þegar á sakaskrá vegna skipulagðrar glæpastarfsemi, m.a. vegna fíkniefnasmygls að því er Reuters greinir frá.
Mennirnir sem hafa viðurkennt að hafa verið á flugvellinum heita Mohamed Lamsalak og Youssef Ben Hammou.