Varanleg undanþága ekki í boði
Setja bókamerki
Ríki sem ganga í Evrópusambandið þurfa að gangast undir yfirstjórn Evrópusambandsins í sjávarútvegsmálum og sameiginlega sjávarútvegsstefnu þess. Einungis kann að vera í boði aðlögun að sáttmálum sambandsins í þeim efnum ef aðstæður réttlæta það.
Þetta kemur fram í bréfi sem Karmenu Vella, yfirmaður sjávarútvegsmála í framkvæmdastjórn Evrópusambandsins, ritaði Ian Duncan sem situr á Evrópuþinginu fyrir skoska íhaldsmenn. Með bréfinu vildi Duncan fá það staðfest að ef Skotland segði skilið við breska konungdæmið og sækti í framhaldinu um inngöngu í Evrópusambandið yrði landið að gangast undir sameiginlega sjávarútvegsstefnu sambandsins sem er illa séð af skoskum sjómönnum.
Ruth Davidson, leiðtogi skoskra íhaldsmanna, hefur sakað Nicolu Sturgeon, fyrsta ráðherra Skotlands og leiðtoga Skoska þjóðarflokksins, um lítilsvirðingu gagnvart skoskum sjávarbyggðum með áformum sínum um skoskt sjálfstæði í ljósi svarbréfs Evrópusambandsins. Með þeim yrði sjávarútvegsmálum Skota áfram stýrt af sambandinu í gegnum sameiginlega sjávarútvegsstefnu þess þó Sturgeon héldi öðru fram.
Fram kom í bréfi Vella að skilyrðin fyrir inngöngu nýs ríkis inn í Evrópusambandið og aðlögun þess að sáttmálum sambandsins væru háð samþykki umsóknarríkisins og þeirra ríkja sem fyrir væru. Sjávarútvegsstjóri Evrópusambandsins bætti síðan við:
„Það verður hins vegar að árétta að varanleg undanþága frá málaflokki sem er háður fullri yfirstjórn [Evrópusambandsins] líkt og sameiginlegu sjávarútvegsstefnunni gengur lengra en sú aðlögun að sáttmálunum sem einungis kann að vera réttlætanleg við inngöngu nýs aðildarríkis.“
Fjallað er um málið á fréttavef breska dagblaðsins Daily Telegraph.
Handteknir eftir myndatöku í Vesturbæjarlaug
Skar höfuðleðrið af íslenskri konu
Tveir í bílnum sem lenti utan vegar
Vélsleðaslys: Þyrlan kölluð út á mesta forgangi
Veiting hvalveiðileyfis ekki brot á EES-samningi
Handtekin eftir að tvö börn fundust látin
Tóku upp hanskann fyrir leikskólabörn