Myndin bönnuð vegna samkynhneigðar

Hollenska kvikmyndin The Dinner Club verður ekki sýnd á evrópskri kvikmyndahátíð í Úganda eins og til stóð. Ástæðan er sú að nefnd sem ritskoðar efni sem birtist í úgönskum miðlum segir myndina „upphefja samkynhneigð“ en samkynhneigð er bönnuð í landinu. BBC greinir frá. 

Sendiráð Hollands í Úganda harmar þessa niðurstöðu og fyrir vikið hyggst Holland ekki taka þátt í umræddri kvikmyndahátíð. Sendiráðið greindi frá þessu í Facebook-færslu sinni.

Nefndin nefndi fjölmörg atriði í myndinni sem stríddu gegn ríkjandi viðhorfum í Úganda. Þetta eru meðal annars „klúrt orðfæri“ og „reykingar, einkum á meðal kvenna“. Auk þess sem „samkynhneigð væri upphafin þá fullyrða tvær giftar konur (líklega giftar körlum) að hjónaband sé hörku vinna. Þetta stríðir gegn gildum Úganda.“ 

Viðbrögð lesenda við Facebook-færslunni eru af ólíkum toga. Margir íbúar Úganda segja ritskoðunina ekki eiga rétt á sér á meðan aðrir eru hlynntir henni og sammála henni. 

Kvikmyndin The Dinner Club var frumsýnd árið 2010. 

Skjáskot úr myndinni The Dinner Club.

• 1 blogg um fréttina

Bloggað um fréttina

• Kristin stjórnmálasamtök: Hollenzk stjórnvöld á sínum villugötum