Höfuðstöðvar fyrir hernaðarsamstarf ríkja Evrópusambandsins gætu litið dagsins ljós innan fárra daga að sögn Federicu Mogherini, utanríkismálastjóra sambandsins, eftir að utanríkisráðherrar ríkjanna komu sér saman um það.
Fram kemur í frétt AFP að málið hafi strandað til þessa á andstöðu Breta. Hins vegar virðist ákvörðun Bretlands um að segja skilið við Evrópusambandið hafa greitt fyrir samkomulagi um höfuðstöðvarnar. Mogherini sagði við blaðamenn í Brussel í Belgíu að endanlegur texti samkomulagsins myndi liggja fyrir innan tveggja daga.
Reiknað er með að tilkynnt verði formlega um stofnun höfuðstöðvanna á morgun. Bretar hafa til þessa lagst gegn höfuðstöðvunum sem litið er á sem skref í áttina að mögulegum Evrópuher. Þá hafa þeir fremur viljað leggja áherslu á hernaðarsamstarf á vettvangi NATO.