Donald Trump Bandaríkjaforseti er með fjóra einstaklinga í huga sem mögulegan arftaka James Comey, sem Trump rak úr starfi sem forstjóra bandarísku alríkislögreglunnar FBI í síðustu viku.
Reuters-fréttastofan hefur eftir Sean Spicer, talsmanni Hvíta hússins, að Trump hafi fundað með starfandi forstjóra FBI, Andrew McCabe, Frank Keating, fyrrverandi ríkisstjóra Oklahoma, fyrrverandi öldungadeildarþingmanninum Joe Liebermann og Richard McFeely, sem áður var hátt settur embættismaður FBI, vegna starfsins.
Bandaríska dómsmálaráðuneytið skipaði í gær fyrrverandi yfirmann bandarísku alríkislögreglunnar FBI, Robert Mueller, sem sérstakan ráðgjafa til að hafa yfirumsjón með rannsókn á afskiptum Rússa af bandarísku forsetakosningunum á síðasta ári.
Mueller mun meðal annars rannsaka mögulegt leynimakk á milli samstarfsmanna Trumps og rússneskra embættismanna.
Dagblaðið New York Times greindi á þriðjudag frá tilvist minnisblaðs sem Comey ritaði um fund þeirra Trump, þar sem forsetinn bað hann að hætta rannsókn á Michael Flynn, fyrrverandi þjóðaröryggisráðgjafa sínum, og meintum samskiptum hans við Rússa áður en Trump tók við embætti.