Fyrrverandi þingmaðurinn Anthony Weiner játaði í dag, með tárin í augunum, að hafa sent stúlku undir lögaldri kynferðislegar myndir af sjálfum sér.
Hann verður á skrá yfir kynferðisglæpamenn og á yfir höfði sér fangavist vegna skilaboðanna sem hann sendi 15 ára stúlku á síðasta ári.
Eiginkona hans, Huma Abedin sem var einn helsti aðstoðarmaður forsetaframbjóðandans Hillary Clinton, óskaði eftir aðskilnaði frá honum eftir að ásakanir um að hann hefði skipst á kynferðislegum skilaboðum við konu birtust í fjölmiðlum.
Weiner sat í fulltrúadeild Bandaríkjaþings fyrir Demókrataflokkinn til ársins 2011. Hann sagði af sér eftir að í ljós kom að hann hefði sent 21 árs gamalli konu klúra ljósmynd af sjálfum sér.
Honum var sleppt gegn tryggingu í dag en þarf að mæta aftur fyrir dómara 8. september. Talið er að hann verður dæmdur í tveggja ára fangelsi.
„Ég er veikur en það er engin afsökun,“ sagði grátandi Weiner í dómssal í dag. Hann viðurkenndi að það væri rangt að hafa sent 15 ára stúlku skilaboð um þriggja mánaða skeið snemma á síðasta ári.
Stúlkan sagði að Weiner hefði beðið hana um að afklæðast fyrir framan myndavél. Faðir hennar sagði við breska fjölmiðla í dag að hann væri ekki viss um að réttlætinu væri fullnægt.