Playboy-fyrirsætan Dani Mathers hefur verið dæmd í 45 daga fangelsi eða 30 daga samfélagsþjónustu fyrir að hafa tekið mynd og gert grín að vaxtarlagi konu í búningsklefa og birt á samfélagsmiðlum.
Mathers var ákærð af lögreglunni í Los Angeles á síðasta ári fyrir brot á lögum um friðhelgi einkalífs, en dómur í málinu féll í dag. Myndin var tekin í búningsklefa af 70 ára gamalli konu í líkamsræktarstöð í Los Angeles, án vitundar konunnar, og birt á samfélagsmiðlum.
Mathers baðst afsökunar fljótlega eftir að hún deildi myndinni en hún segist hafa talið sig vera að deila myndinni í lokuðu samtali á Snapchat og bætti við að hún teldi rangt að dæma fólk út frá vaxtarlagi.
Mathers verður auk þess á skilorði í þrjú ár og má ekki taka myndir af fólki eða birta þær á netinu nema með samþykki viðkomandi. Eftir að málið kom upp í fyrra var Mathers bannaður aðgangur að öllum líkamsræktarstöðvum keðjunnar sem um ræðir, sagt upp störfum á útvarpsstöðinni þar sem hún starfaði og sætti mikilli gagnrýni í netheimum.