Fyrrverandi eiginkona eins árásarmannanna í London hefur rætt um það í breskum fjölmiðlum að einn daginn þurfi hún að útskýra fyrir dóttur sinni hvað pabbi hennar gerði.
Charisse O'Leary segist hafa komist í „mikið uppnám, hafa verið leið og dofin“ þegar hún frétti að Rachid Redouane hefði verið meðal þeirra sem frömdu voðaverkin í London á laugardagskvöld.
Átta létust í árásinni.
„Núna þarf ég að einbeita mér að því að ala dóttur mína upp vitandi það að einn daginn verð ég að útskýra fyrir henni hvað pabbi hennar gerði,“ sagði O'Leary.
Rachid Redouane var þrítugur en hann gekkst einnig við nafninu Rachid Elkhdar.
Áður hafði móðir Youssef Zaghba, annars árásarmanns, tjáð sig við Sky News. „Ég á engin orð. Þetta er of stórt,“ sagði Collina.