Donald Trump Bandaríkjaforseti hvatti stuðningsmenn sína til dáða í dag og sagðist ætla að berjast gegn andstæðingum sínum. Hann minntist þó ekki beint á vitnisburð James Comey, fyrrverandi forstjóra alríkislögreglunnar FBI.
Comey sat fyrir svörum rannsóknarnefndar öldungadeildarþings Bandaríkjanna í dag vegna samskipta sinna við Donald Trump en Trump rak Comey úr starfi í byrjun maí.
„Þau munu ekki snúa okkur frá okkar réttláta málstað,“ sagði Trump í höfuðborg Bandaríkjanna, Washington, í dag.
„Við vitum betur en nokkur annar hvernig á að berjast og munum aldrei gefast upp. Við gefumst ekki upp, við erum sigurvegarar og ætlum að berjast, sigra og framtíðin verður ótrúleg,“ bætti Trump við.
Í vitnisburði Comey, sem var lekið á netið í gær, kom meðal annars fram að Trump hefði krafist hollustu af hans hálfu og beðið hann um að falla frá rannsókn á tengslum Michael Flynn, fyrrverandi þjóðaöryggisráðgjafa, við ráðmenn í Rússlandi, í tveggja manna kvöldverðarboði þann 14. febrúar síðastliðinn. Comey þóttu samskiptin óþægileg og ákvað að skrifa minnispunkta um hvað fór fram á milli hans og forsetans.
„Ég get sagt það með fullri vissu að forsetinn er ekki lygari og svona spurningar eru móðgandi,“ sagði Sarah Huckabee Sanders, talsmaður Hvíta hússins.
„Þau munu ljúga, þau munu trufla okkur. Þau eiga eftir að dreifa hatri en við munum ekki snúa frá því sem er rétt,“ sagði Trump.