„Við verðum að halda áfram að mótmæla á götum úti alveg þar til Maduro lætur af völdum eða herinn hættir að styðja hann,“ segir Venesúelamaðurinn Freddy Guevara um mótmælin sem hafa staðið yfir í landinu síðustu tvo mánuði.
Ekki hefur dregið úr mótmælunum í Venesúela sem virðast frekar stigmagnast. Tala látinna er kominn upp í 66i. 17 ára gamall maður lést í mótmælunum á miðvikudaginn í Caracas, höfuðborg landsins eftir átök við herinn. Áður hafði varnarmálaráðherra landsins, Vladimir Padrino Lopez, varað herinn við að beita mótmælendur ofbeldi.
Lát hans verður rannsakað er haft eftir stjórnvöldum. Öryggisliðar, her og lögregla, eru sögð bera ábyrgð á láti hans. Lögreglan og herinn eru sökuð um að beita ofbeldi gegn mótmælendum. Táragasi hefur verið beitt gegn mótmælendum og átök milli þeirra eru tíð.
Stjórnarandstaðan í Venesúela efnir til daglegra mótmælafunda þar sem þess er krafist að Nicolas Maduro, forseti landsins, láti af völdum. Segir hún efnahagskreppuna í Venesúela og skort á matvælum, lyfjum og öðrum nauðsynjum vera forsetanum að kenna.
Maduro sakar stjórnarandstöðuna aftur á móti um að leggja á ráðin um valdarán gegn sér með stuðningi bandarískra stjórnvalda og segir kreppuna vera kapítalískt samsæri.