Helmut Kohl látinn

Helmut Kohl, fyrrverandi kanslari Þýskalands, er látinn, 87 ára gamall. Hann lést á heimili sínu í Ludwigshafen í Rínarlandi í vesturhluta Þýskalands.

Kohl var kanslari Þýskalands í 16 ár, frá árinu 1982 til 1998. Þáttur hans við að sameina Austur- og Vestur-Þýskaland eftir fall Berlínarmúrsins er talinn mikill.

Hann og Francois Mitterand, fyrrverandi forseti Frakklands, voru jafnframt mennirnir á bak við evruna.

Kohl árið 2012 ásamt Angelu Merkel, kanslara Þýskalands. AFP

Í Bretlandi er hans minnst fyrir ágreining sinn við Margréti Thatcher, fyrrverandi forsætisráðherra Bretlands, vegna Evrópusambandsins, að því er kemur fram á BBC.

Kohl datt illa árið 2008 og notaði hjólastól eftir það.

„Vinur frelsisins“

George H.W. Bush, fyrrverandi forseti Bandarkjanna, segir að Kohl hafi verið „sannur vinur frelsisins“ og „einn af merkustu leiðtogum Evrópu eftir síðari heimsstyrjöldina“.

„Helmut þoldi ekki stríð en hann hataði einræðishyggju enn meira,“ sagði Bush í yfirlýsingu sinni.

„Eitt af því gleðiríkasta í mínu lífi var að vinna með góðvini mínum við að ljúka kalda stríðinu á friðsamlegan hátt og að sameina Þýskaland innan Nató.“

Kohl og Boris Jeltsín, forseta Rússlands, árið 1993. AFP

Kohl ásamt Bill Clinton, fyrrverandi forseta Bandaríkjanna í bandarísku forsetaflugvélinni, árið 1998. AFP

• Blogga um frétt