Elísabet Bretadrottning og Vilhjálmur prins heimsóttu hjálparmiðstöð í Westway-íþróttamiðstöðinni þar sem hlúð hefur verið að íbúum Grenfell-turnsins sem lifðu af eldsvoðann sem kom upp í byggingunni fyrr í vikunni og kostaði að minnsta kosti 30 lífið.

Drottningin og prinsinn ræddu við sjálfboðaliða, íbúa og fulltrúa hverfisfélagsins samkvæmt frétt breska ríkisútvarpsins BBC. Talaði Elísabet um hugrekki slökkviliðsmanna og fórnfýsi sjálfboðaliða sem boðið hefðu fram aðstoð sína við að hlúa að íbúunum.