Segir Kohl hafa breytt lífi sínu

Angela Merkel, kanslari Þýskalands, segir að Helmut Kohl, fyrrverandi kanslari sem lést í dag, hafi breytt lífi hennar með því að sameina Þýskaland.

„Helmut Kohl gjörbreytti lífi mínu,“ sagði Merkel.

Hún ólst upp í Austur-Þýskalandi og hóf feril sinn í stjórnmálum eftir að Berlínarmúrinn féll, undir handleiðslu Kohl.

Frétt af mbl.is

Helmut Kohl látinn

Hún segir að það hafi verið Kohl að þakka að hún og milljónir annarra hafi getað lifað lífi sínu frjáls undan einræðinu sem ríkti í Austur-Þýskalandi.

„Allt það sem hefur gerst á síðustu 27 árum þar til í dag er óhugsandi án framlags Helmuts Kohl,“ sagði hún.

„Það mun líða einhver tími þangað til við áttum okkur almennilega á því hvað við höfum misst með andláti hans,“ bætti hún við og sagðist „persónulega vera þakklát fyrir að hann hafi verið til staðar“.

„Ég beygi mig í virðingarskyni við hann,“ sagði hún og lýsti Kohl sem „merkum Þjóðverja og merkum Evrópubúa“.

• Blogga um frétt