Jarðskjálfti af stærðinni 4 reið yfir vesturhluta Grænlands um þrjátíu kílómetrum norður af Nuugaatsiaq í gærkvöldi. 

Flóð hafa orðið í kjölfar jarðskjálftans, að því er kom fram á vefsíðu DR. 

„Það er ljóst að flóðin í þorpunum Illorsuit og Nuugaatsiaq urðu vegna jarðskjálfta,“ sagði lögreglan.

Brottflutningur íbúa í Nuugaatsiaq til bæjarins Uumannaq er hafinn. Þyrlur hafa verið notaðar til þess að flytja fólkið. Um 100 manns búa í Nuugaatsiaq. 

Fólki sem býr í fjörðunum í kringum Uumannaq hefur verið ráðlagt að halda sig fjarri ströndinni.

Samkvæmt grænlenska fjölmiðlinum KNR hafa einhverjar fregnir borist um að fólk hafi slasast. Lislotte Bøhm hjá lögreglunni á Grænlandi vill ekki staðfesta þetta. Einnig er óljóst með tjón af völdum flóðsins. 

„Það er ekki eðlilegt að við séum með svona stóra jarðskjálfta á Grænlandi,“ sagði Trine Dahl Jensen, vísindamaður sem Berlinske Tidende ræddi við.

Hún bætti við að hætta sé á eftirskjálftum og fleiri flóðbylgjum.

„Hræðilegar náttúruhamfarir í Nuugaatsiaq,“ skrifaði Lars Løkke Rasmussen, forsætisráðherra Dana á Twitter.

Frá Nuuk, höfuðborg Grænlands. mbl.is/Una Sighvatsdóttir

Tengdar fréttir

Jarðskjálfti og flóðbylgja á Grænlandi

Styrkja grænlenskt flóttafólk

• Úthlutaði um 40 milljónum á hamfarasvæðum á Grænlandi
• Öldurnar allt að 90 metra háar
• Veitir aðstoð á Grænlandi
• Flateyringar söfnuðu hálfri milljón

» Fleiri tengdar fréttir

• Blogga um frétt