Fjöldi látinna eftir sprengingu í kolanámu við bæinn Cucunuba í Kólumbíu á föstudag hefur hækkað upp í þrettán. Greint var frá því í gær að átta væru látnir en fimm saknað, en yfirvöld í Kólumbíu hafa nú staðfest að allir þrettán sem voru í námunni létust.
Sett hefur verið af stað rannsókn til að komast að því hvað olli sprengingunni, en talið er að hún hafi orðið vegna uppsöfnunar metangass. Náman var starfrækt í leyfisleysi.
Juan Manuel Santos, forseti Kólumbíu, hefur kallað eftir strangari öryggiskröfum í námum í kjölfar atviksins. Þá hefur hann sent samúðarkveðjur til fjölskyldna fórnarlambanna.