Hættu eftir að grein var afturkölluð

Merki CNN.
Merki CNN. Af vef CNN

Þrír blaðamann CNN, þar á meðal ritstjóri nýrrar rannsóknardeildar, hafa sagt upp störfum eftir að útgáfa á grein tengd Rússlandi var afturkölluð. Um var að ræða grein sem CNN hafði birt á vef sínum um náinn bandamann Donald Trump forseta. CNN neyddist til þess að draga greinina til baka og biðjast afsökunar. 

Í greininni var Anthony Scaramucci, sem stýrir vogunarsjóð og trúnaðarvinur Trump, sagður vera til rannsóknar hjá þingnefnd öldungadeildarinnar sem er að rannsaka tengsl Rússa við framboð Trump.

Greinin var fjarlægð af vef CNN í síðustu viku eftir að yfirmenn CNN töldu að fyrirtækið gæti ekki staðið fyllilega við það sem þar kom fram.

Þeir sem sögðu upp í gær eru Thomas Frank, sem skrifaði greinina, Eric Lichtblau, ritstjóri innan deildarinnar og Lex Haris, aðalritstjóri deildarinnar. 

Bæði CNN og New York Times fjalla um uppsagnirnar. Talsmaður CNN segir að útgáfufyrirtækið hafi staðfest uppsagnir starfsmannanna. Innri rannsókn CNN leiddi í ljós að vinnureglum CNN hafi ekki verið fylgt í hvívetna við vinnslu fréttarinnar. Aðeins ein nafnlaus heimild var á bak við fréttina.

Slíkar fréttir eru yfirleitt sendar í yfirlestur á nokkrum stöðum fyrir birtingu. Þar á meðal deild sem annast staðreyndavöktun, sérfræðinga í blaðamennsku og lögfræðinga.

Á starfsmannafundi síðdegis í gær var rannsóknarblaðamennskudeildinni tjáð að þessi viðbrögð fyrirtækisins þýddu ekki endilega að fréttin væri röng heldur að hún væri ekki nægjanlega traust til þess að vera birt sem slík. 

Fréttin var aldrei birt í ljósvakamiðlum en birt á fréttavef CNN og dreift á samfélagsmiðlum þess. 

mbl.is

Bloggað um fréttina

Fleira áhugavert
Fleira áhugavert