Mariano Rajoy, forsætisráðherra Spánar, hvatti fólk til að sýna stillingu eftir fréttir sem bárust í gær þess efnis að Katalónía muni strax lýsa yfir sjálfstæði ef meirihluti styður sjálfstæði héraðsins frá Spáni í þjóðaratkvæðagreiðslu 1. október.
„Til allra Katalóníumanna, til allra Spánverja, vil ég beina þeim orðum að þeir geta treyst framtíðinni, þar sem einræðislegar sjálfsblekkingar... munu aldrei yfirbuga ró og samkennd okkar lýðræðisríkis,“ sagði Rajoy á útifundi í Madríd í dag.
Katalónía er eitt af ríkustu héruðum Spánar en þar búa um 7,5 milljónir manna. Carles Puigdemont, leiðtogi Katalóníu sagði í gær að héraðið myndi lýsa yfir sjálfstæði strax, ef niðurstaða fyrirhugaðrar atkvæðagreiðslu yrði jákvæð.
Kjósendur munu svara spurningunni: „Vilt þú að Katalónía verði sjálfstætt lýðveldi?“ Spænsk stjórnvöld eru mótfallinn atkvæðagreiðslunni en aðskilnaðarsinnar í Katalóníu hafa lengi haldið því fram að þeir ættu að slíta sig frá Spáni.