610.000 fóstureyðingar þrátt fyrir bann

Á hverjum degi deyja þrjár konur á Filippseyjum vegna vandkvæða í kjölfar meðgöngurofs. Fóstureyðingar eru ólöglegar og því grípa konur til þess ráðs að nota grillspjót eða herðatré til að rjúfa meðgöngu, eða kasta sér niður stigann.

Margar grípa einnig til þess ráðs að láta nudda magann á sér harkalega í marga daga en aðgerðasinninn Marevic Parcon hjá Women's Global Reproductive Rights (WGNRR) segir um að ræða afar sársaukafulla leið til að binda enda á meðgöngu.

Umfjöllun um stöðu kvenna á Filippseyjum má finna hjá Guardian en þar er m.a. greint frá því hvernig jurtir og lyf sem notuð eru til að rjúfa meðgöngu eru seld á markaði við Quiapo-kirkjuna í Manila, stærstu kaþólsku kirkju borgarinnar, þrátt fyrir afstöðu kirkjunnar til getnaðarvarna og fóstureyðinga.

„Það gildir einu hversu mikið þeir neita því að fóstureyðingar eigi sér stað í landinu, þetta er að gerast fyrir framan nefið á þeim,“ segir Parcon um kirkjuna.

Meira en 65% kvenna á Filippseyjum nota ekki nútímagetnaðarvarnir og þá deyja 114 af hverjum 100.000 konum í eða í kjölfar fæðingar.

Parcon segir feðraveldismenninguna stjórna líkömum kvenna en þrátt fyrir að meðgöngurof sé ólöglegt á Filippseyjum er talið að 610.000 fóstureyðingar séu framkvæmdar í landinu á hverju ári.

Umfjöllun Guardian.

• 1 blogg um fréttina

Bloggað um fréttina

• Lífsréttur: Reynt að slá upp ástandi þungunarmála á Filippseyjum í neikvæðu …