Fyrrverandi kórstjóri drengjakórs Regensburger-Dómkirkjunnar í Þýsklandi, þar sem yfir 500 drengir sættu kynferðislegu og líkamlegu ofbeldi á nokkurra áratuga tímabili, er sagður hafa verið ofstækismaður sem nemendur hans hræddust. Það er eftirmaður kórstjórans sem lét orðin falla. AFP fréttastofan greinir frá
Georg Ratzinger, eldri bróðir Benedikts fyrrverandi páfa, stjórnaði kórnum fræga á árunum 1964 til 1994. Roland Buechner, eftirmaður hans, sagði í samtali við þýska vikublaðið Die Zeit, að Ratzinger hefði verið sérlega hvatvís ofstækismaður og mjög vægðarlaus þegar hann kom á framfæri sínum hugmyndum um tónlistarlegan aga.
„Svo gat hann verið ljúfur sem lamb í kjölfarið. Sumir nemenda hans litu upp til hans á meðan aðrir óttuðust að hann myndi lemja þá,“ sagði Buechner. Hann vill meina að undir hans tónsprota hafi þróast kerfisbundinn ótti á meðal kórdrengjanna.
„Hann var ekki bara að slá á fingur, heldur voru þetta virkilegar líkamsmeiðingar. Það var mikil reiði og áverkar,“ sagði Buechner jafnframt.
Ratzinger sjálfur, sem er 93 ára, hefur sagt að hann kannist ekki við að ofbeldi hafi viðgengist í skólanum.
Kórinn sem um ræðir á sér þúsund ára langa sögu. Árið 2010 bárust fréttir um að innan hans hefðu viðgengist kynferðisbrot en það var um svipað leyti og hulunni var svipt af fjölmörgum slíkum málum innan kaþólsku kirkjunnar. Á þriðjudag var birt skýrsla nefnda sem rannsakað hafa ásakanir um kynferðisbrot innan drengjakórs Regensburg-dómkirkjunnar sem kynnt var í dag.
Lögfræðingurinn Ulrich Weber fór fyrir rannsókninni, en í skýrslunni kemur fram að á árabilinu 1945 og þar til snemma á tíunda áratug síðustu aldar hafi hann fundið 67 dæmi um kynferðislega misnotkun og 500 um annars konar líkamlegt ofbeldi. Sumir drengirnir voru beittir bæði kynferðislegu og líkamlegu ofbeldi.
Weber segir að mikil þöggun hafi ríkt um málið og segir ábyrgðina meðal annars hvíla á fyrrgreindum Ratzinger. Weber segir hann hafa brugðist með því að grípa ekki í taumana. Í stað þess hafi hann litið undan og ekki skipt sér af.