Maðurinn sem Noregur losnar ekki við

Norska lögreglan að störfum. Mynd úr safni.
Norska lögreglan að störfum. Mynd úr safni. AFP

Eftir að hafa rotað mann með gaskút, rænt leigubílstjóra, selt óeinkennisklæddum lögreglumönnum hass, framið tvö rán, hótað lögreglumönnum, fangavörðum og nokkrum öðrum borgurum lífláti og í heildina brotið gegn tólf manns myrti Belal Belal líklegast mann á þriðjudaginn. Nægir þetta til þess að vísa honum úr landi? Hugsanlega ekki.

Belal Belal, sem segir norskum yfirvöldum að hann viti ekki hvað hann í raun heiti og segist koma frá Alsír, er líklega ólöglegur innflytjandi og síbrotamaður frá Marokkó, að því er lögreglan í Ósló telur sig geta sýnt fram á, en þar til hún getur sannað það er ekki hægt að vísa Belal úr landi þrátt fyrir að hann hafi hlotið varanlega brottvísun árið 2008. Norska dagblaðið VG er meðal fjölmiðla sem fjallað hafa ítarlega um málið í vikunni.

Samkvæmt norskum lögum er ekki hægt að vísa ólöglegum innflytjendum úr landi nema vitað sé hvert á að senda þá.

Auk þess að hafa rotað mann með gaskút að vopni, reynt að selja óeinkennisklæddum lögreglumönnum hass, verið tekinn með 216 grömm af hassi og skotvopn, rænt fjölda manns, reynt að stinga að minnsta kosti eina manneskju, logið að yfirvöldum um nafn og uppruna hefur Belal Belal, sem svo er kallaður til að kalla hann eitthvað í opinberum skjölum, nú líklegast að auki myrt mann á götu í Ósló.

Frá Ósló.
Frá Ósló. AFP

Staddur á morðvettvangi á þriðjudag

Fyrir þrjú af ofangreindum brotum hlaut Belal eins árs fangelsisdóm og var 236 daga gæsluvarðhald dregið frá afplánun hans. Hann losnaði úr þeirri vist fyrir nokkrum vikum. Sakaskráin er löng og fjallaði VG um Belal árið 2015 og kallaði hann „manninn sem Noregur losnar ekki við“.

Á þriðjudagskvöldið fannst maður með alvarlega höfuðáverka á götu í Bjerke í Ósló og sáust tveir menn á upptökum úr eftirlitsmyndavélum forða sér á hlaupum frá staðnum. Örugg kennsl voru borin á Belal sem annan þeirra manna og hefur hann nú verið úrskurðaður í fjögurra vikna gæsluvarðhald. Fórnarlamb árásarinnar lést á sjúkrahúsi í gærkvöldi og á nú innflytjandinn nafnlausi yfir höfði sér morðákæru ofan á fyrri feril.

Lögreglumaður á verði í Ósló.
Lögreglumaður á verði í Ósló. AFP

Er hægt að vísa honum úr landi?

Þrátt fyrir að á 12 ára búsetutíð í Noregi hafi ofbeldisbrot gagnvart 12 manns sannast á Belal virðast norsk yfirvöld ekki eiga þess nokkurn kost að vísa honum úr landi, eingöngu vegna þess að ekki liggur fyrir til hvaða upprunalands beri að vísa honum.

Unni Fries, skipaður verjandi Belal, biðst undan því, í viðtali við VG, að tjá sig um réttarstöðu skjólstæðings síns í Noregi. „Það eina sem ég get sagt er að hann neitar sök,“ segir Fries. Hilde Strand, saksóknari hjá lögreglunni í Ósló, hefur ekki mikið meira að segja. Hún segir að lögreglan þekki til stöðu Belal, sem fram að þessu hafi haldið því fram að hann viti ekki nafn sitt og komi frá Alsír. „Við vitum ekki til þess að nein breyting hafi orðið á þeirri stöðu,“ segir Strand.

Í fyrri málum Belal komust tveir dómkvaddir geðlæknar að þeirri niðurstöðu að hann væri ábyrgur gjörða sinna og meðvitaður um þær þegar hann framdi afbrot sín.

mbl.is
Fleira áhugavert
Fleira áhugavert