Verulegur matvælaskortur blasir nú við íbúum Norður-Kóreu, eftir eina verstu þurrkatíð sem landið hefur orðið fyrir í ein 15 ár. Í yfirlýsingu frá Matvæla- og landbúnaðarstofnunar Sameinuðu þjóðanna (FAO) er hvatt til matvælainnflutnings til landsins svo börn muni ekki svelta.
Lítið hefur rignt í Norður-Kóreu fyrri hluta þessa árs, sem hefur skaðað uppskeru bænda, en vannæring var fyrir algengt vandamál hjá íbúum landsins. Vincent Martin, sendifulltrúi FAO í Kína og Norður-Kóreu, segir þurrkatíðina líklega til að draga verulega úr fæðuöryggi stórs hluta landsmanna.
Hungursneyð hefur komið upp reglulega í Norður-Kóreu síðastliðna áratugi og kostaði m.a. hundruð þúsunda manna lífið á tíunda áratug síðustu aldar.
Jafnvel þegar vel árar búa 40% íbúa landsins við vannæringu samkvæmt stöðlum Sameinuðu þjóðanna.
Verulega hefur dregið úr mataraðstoð frá öðrum ríkjum heims undanfarinn áratug, vegna deilna um kjarnorkuáætlun ráðamanna Norður-Kóreu.