Grunaður um hafa myrt konu sína og börn

Maður sem liggur undir grun fyrir að hafa myrt konu sína og þrjú börn í Gautaborg á fimmtudag hefur verið úrskurðaður í gæsluvarðhald. Hann neitar sök og hefur kært úrskurðinn.

Greint er frá málinu á vef sænska ríkisútvarpsins. Á fimmtudaginn voru lögregla og slökkvilið kölluð úr vegna elds í íbúð í Gårdsten í Gautaborg. Kona og barn fundust látin en tvö börn voru alvarlega særð. Þau voru flutt á sjúkrahús og dóu af sárum sínum. 

Maðurinn, sem er á sextugsaldri, stóð fyrir utan bygginguna á meðan björgunaraðgerðir fóru fram og var síðar handtekinn vegna gruns um að hafa ráðið þeim bana.