Recep Tayyip Erdogan, forseti Tyrklands, hefur hvatt alla múslima til að ferðast til Jerúsalem og vernda borgina. Ummælin lét forsetinn falla í kjölfar þess að til átaka kom þegar Ísraelsmenn settu upp málmleitarhlið við Musterishæðina.
„Héðan vil ég skora á alla múslima. Hver sá sem hefur tækifæri til ætti að heimsækja Jerúsalem, Al-Aqsa-moskuna,“ sagði Erdogan í Ankara. „Komum, stöndum öll vörð um Jerúsalem.“
Umrædd moska stendur á Musterishæðinni, sem múslimar kalla Haram al-Sharif. Svæðið er meðal helstu deilumála Ísraelsmanna og Palestínumanna.
Ísraelsk yfirvöld létu koma upp málmleitarhliðum við svæðið í kjölfar þess að tveir ísraelskir lögreglumenn létust þar í árás 14. júlí sl. Palestínumenn sáu aðgerðina hins vegar sem enn eitt dæmið um valdbeitingu Ísraelsmanna.
Til átaka kom í kjölfar mótmæla.
„Þeir eru að freista þess að taka moskuna af múslimskum höndum undir þeim fyrirslætti að vera að berjast gegn hryðjuverkum,“ sagði Erdogan. „Það er engin önnur skýring á þessu.“
Hann sagði lögmæti aðgerða Ísraelsmanna byggja á þeirri virðingu sem þeir sýndu Palestínumönnum og réttindum þeirra.
Forsetinn fordæmdi á sama tíma árásir á bænahús gyðinga í Tyrklandi og sagði það ekki rétt viðbrögð við fréttum frá Jerúsalem. „Þetta er ekki í takt við trú okkar og er ekki leyfilegt,“ sagði hann.