Japönsk kona hefur verið handtekin fyrir að eyðileggja fiðlusafn fyrrverandi eiginmanns síns. Safnið er virði tæpra 106 milljóna japanskra jena eða um 99 milljóna íslenskra króna.
Atvikið átti sér stað í miðjum skilnaði þeirra hjóna árið 2014 en konan var ekki handtekin fyrr en nú. Að sögn lögreglu er konan grunuð um að hafa brotist inn í íbúð mannsins í borginni Nagoya og skemmt 54 fiðlur auk 70 fiðluboga. Þetta kemur fram í frétt BBC.
Talið er að fyrrverandi eiginmaður hennar hafi bæði smíðað og safnað fiðlum. Japanskir fréttamiðlar greindu frá því að dýrmætasta fiðlan hefði verið gerð á Ítalíu og verið virði 50 milljóna jena eða um 47 milljóna íslenskra króna.