Vinna að framkvæmd bannsins
Setja bókamerki
Ekki hefur verið tekin ákvörðun um það innan Hvíta hússins hvernig ákvörðun Donalds Trumps Bandaríkjaforseta um að banna transfólki að ganga í herinn verður framkvæmd. Talskona Hvíta hússins segir að um hernaðarákvörðun sé að ræða, og unnið sé nú að framkvæmdinni. BBC greinir frá.
Trump tilkynnti á Twitter-síðu sinni í gær að herinn mætti ekki við þeirri „fjárhagslegu byrði og truflun“ sem af transfólki myndi hljótast. Því ætti transfólk ekkert erindi í bandaríska herinn, sem verði að einbeita sér að „afgerandi sigri“.
Mannréttindasamtök um allan heim hafa gagnrýnt Trump harðlega eftir tilkynninguna, og sagt hana stórhættulega fyrir transfólk.
Sarah Huckabee Sanders, talskona Hvíta hússins, sagði að ríkisstjórn Trumps myndi vinna samhliða Pentagon, varnarmálaráðuneyti landsins, að framkvæmd bannsins.
Ekki er enn ljóst hvaða áhrif bannið hefur á transfólk sem þegar sinnir þjónustu í hernum. Hafa nokkrir núverandi hermenn lýst yfir áhyggjum sínum af því að vera reknir úr hernum eða fá ekki að sinna þjónustu þar áfram.
Margfalt hærri kostnaður af viagra en transfólki
Bandarískir fjölmiðlar hafa margir hverjir sett spurningamerki við þau rök forsetans að fjárhagsleg byrði fylgi því að hafa transfólk í hernum. Vekur Washington Post til að mynda athygli á greiningu á útgjöldum hersins þar sem fram kemur að árlega fari um 42 milljónir dollara í stinningarlyfið viagra, sem sé margfalt hærri kostnaður en kostnaður við heilbrigðisþjónustu transfólks í hernum.
Á blaðamannafundi í dag var Sanders spurð að því hvort transfólk sem þegar væri í hernum yrði rekið úr honum sagði hún að enn ætti eftir að ákveða hvernig framkvæmdinni yrði háttað. „Ákvörðunin er byggð á hernaðarákvörðun. Þessu er ekki ætlað að vera neitt meira en það,“ sagði hún.
Sanders sagði ákvörðunina hafa verið tekna í samráði við herinn, en varnarmálaráðherrann James Mattis segist ekki hafa vitað af henni fyrr en Trump tilkynnti um hana á Twitter.
Sjálfstæða greiningarfyrirtækið Rand Corporations hefur áætlað að um fjögur þúsund transeinstaklingar séu í bandaríska hernum, en aðrir hafa sagt fjöldann vera nær tíu þúsund. Þá telur fyrirtækið að kostnaðurinn við kynleiðréttingarferli transfólks, sem herinn þyrfti að standa straum af, myndi nema 3-4 milljónum dala árlega. Samanlagður árlegur heilbrigðiskostnaður hersins nemur 6 milljörðum dala.
Barack Obama, fyrrverandi Bandaríkjaforseti, tilkynnti á síðasta ári að transfólki væri heimilt að ganga í herinn en fyrr í þessum mánuði samþykkti Mattis að fresta gildistöku ákvörðunarinnar. Virðast tíst Trumps benda til þess að hann hafi ákveðið að falla alfarið frá stefnu forvera síns.
Í dag rennur út sá frestur sem herinn hafði til að undirbúa heilbrigðisþjónustu sína fyrir herþjónustu transfólks.
Þá stendur yfir umræða í bandaríska þinginu um 700 milljarða fjárveitingu til Pentagon en repúblikanar hafa lagt fram viðauka við umrætt frumvarp sem bannar hernum að verja fjármunum í kynleiðréttingaraðgerðir og/eða tengdar hormónameðferðir.
Trump hét því í aðraganda forsetakosninganna í fyrra að standa vörð um ýmis réttindi hinsegin fólks og sagði m.a. að transfólk ætti að nota það salerni sem því þætti viðeigandi. Hann hafði hins vegar ekki setið lengi í embætti þegar hann afturkallaði tilmæli Obama til ríkisskóla um að heimila transnemum að nota salerni að eigin vali.
Frétt mbl.is: Transfólk ekki í herinn á tilætluðum tíma
Hæstiréttur staðfestir vanhæfi alls Landsréttar
Aðkoman í gripahúsið mjög slæm
Mun fara sparlega með málskotsréttinn
Spursmál: Fyrsta stóra viðtal Katrínar
Hyggjast leyfa fólki að skoða gosið
Nauðgaði kærustu sinni og tók það upp
29 nautgripir fundust dauðir