Obamacare lifir - þungt högg fyrir Trump
Setja bókamerki
Öldungadeild Bandaríkjanna hafnaði í nótt afnámi Obamacare, heilbrigðislöggjöf forsetans fyrrverandi, en um er að ræða verulegt bakslag fyrir ríkisstjórn Donalds Trumps og Repúblikanaflokkinn. Þrír flokksmenn greiddu atkvæði á móti frumvarpinu, sem var fellt með 51 atkvæði á móti 49.
John McCain, sem snéri aftur til Washington í vikunni eftir að hafa verið greindur með heilakrabbamein, var einn þeirra sem greiddi atkvæði á móti frumvarpinu.
Tillagan sem lá fyrir þinginu hefur verið kölluð „skinny repeal“ vestanhafs en hún gekk út á að afnema þau ákvæði Obamacare sem kveða á um að allir Bandaríkjamenn verði að vera sjúkratryggðir, ella sæta sektum.
Samkvæmt hinni ópólitísku fjárlagnefnd þingsins hefðu 15 milljónir manna orðið af sjúkratryggingum ef frumvarpið hefði farið í gegn og iðgjöld hækkað um 20%.
Trump gaf út yfirlýsingu á Twitter snemma í morgun þar sem hann sagðist nú vilja láta Obamacare „springa“. Repúblikanarnir þrír og demókratarnir 48 hefðu brugðist bandarísku þjóðinni.
Áður en atkvæðagreiðslan fór fram hvatti McCain blaðamenn til að fylgjast með en hann og varaforsetinn Mike Pence áttu síðan 20 mínútna samræður og leiða má líkur að því að tilgangur þeirra hafi verið að fá McCain til að hverfa frá afstöðu sinni.
En svo fór sem fór.
Eftir atkvæðagreiðsluna sagði Chuck Schumer, leiðtogi demókrata í öldungadeildinni, að hann og McCain hefðu talast við þrisvar til fjórum sinnum á dag síðan síðarnefndi snéri aftur til starfa.
„Hann er hetja,“ sagði Schumer um McCain. „Hann er hetjan mín.“
Þingmaðurinn sagðist ekki muna eftir dramatískara kvöldi, nema ef til vill þegar dóttir hans kom í heiminn.
Repúblikanar eru klofnir í afstöðu sinni til þess hvernig á að afnema Obamacare; hörðustu íhaldsmenn vilja lögin burt í heild sinni en hófsamari armur flokksins vill halda í ýmis ákvæði sem hafa reynst vel.
Demókratar hafa viðurkennt að heilbrigðislöggjöfin sé ófullkomin og hvatt repúblikana til þess að vinna að því með sér að betrumbæta hana.
„Menn eru bara búnir að forgangsraða“
Stóraukið fé til samgöngusáttmála
Þrjú og hálft ár fyrir skotárás í Úlfarsárdal
Hafa samþykkt kaup fyrir um 9,2 milljarða
„Það er skiljanlegt að þolinmæði þeirra sé lítil“
Aukin tíðni þungunarrofa hjá yngsta aldurshópnum
Kvikan virðist nú skiptast til helminga