Erlent | mbl | 4.8.2017 | 23:57

Vill ekki að alþjóðasamfélagið skipti sér af

Mótmæli geysa í Venesúela. AFP

Umdeilt stjórnlagaþing er komið saman í Venesúela, þrátt fyrir mikil mótmæli í landinu í framhaldi af kosningum til þingsins sem fram fóru síðasta sunnudag. Nýkjörinn forseti stjórnlagaþingsins varar alþjóðasamfélagið við því að skipta sér af málum í landinu.

Nicolás Maduro, forseti Venesúela, segir stjórnlagaþingið nauðsynlegt til að stuðla að frið í landinu eftir nokkurra mánaða óróleika. Stjórnarandstæðingar segja aftur á móti að með hinni nýju stofnun, sem verður falið að endurskrifa stjórnarskrá landsins, leitist forsetinn eftir því að auka völd sín.

Frétt af mbl.is

Vill stjórna án takmarkana

Mikil mótmæli hafa staðið yfir í landinu og í höfuðborginni Caracas hefur lögregla beitt táragasi á mótmælendur sem reyndu að brjóta sér leið að þinginu. Nokkrir slösuðust þegar öryggissveitir reyndu að tvístra nokkur hundruð mótmælendum í sundur að því er fregnir herma.

Varar aðrar þjóðir við því að skipta sér af

Á öðrum svæðum í borginni komu saman þúsundir stuðningsmanna ríkisstjórnarinnar til að fagna og veifuðu fánum er fulltrúar stjórnlagaþingsins tóku sæti við setningu þingsins í dag. Einhverjir þeirra báru myndir af Hugo Chávez, fyrrum leiðtoga landsins, og af sjálfstæðishetjunni Simón Bolivar.

Á meðan sumir mótmæltu fögnuðu aðrir. AFP

Meðal þeirra 545 fulltrúa sem í dag tóku sæti á stjórnlagaþingi eru bæði eiginkona og sonur Maduro forseta. Þá var fyrrum utanríkisráðherra landsins og náinn bandamaður forsetans, Delcy Rodriguez, kjörin forseti þingsins.

Í opnunarræðu sinni fór Rodriguez hörðum orðum um stjórnarandstæðinga og kallaði þá „fasista“ auk þess sem hún varaði alþjóðasamfélagið við því að skipta sér af innanlandsmálum í Venesúela.

Frétt BBC

Delcy Rodriguez, forseti stjórnlagaþingsins og fyrrverandi utanríkisráðherra Venesúela, varar alþjóðasamfélagið við því að skipta sér af innanríkismálum í landinu. AFP