Donald Trump Bandaríkjaforseti segir að hugsanlega hafi hann ekki tekið nógu sterkt til orða þegar hann talaði um að svara hótunum Norður-Kóreu með eldi og brennisteini.
Trump segir einnig að Kínverjar geti aukið þrýsting sinn á stjórnvöld í Norður-Kóreu mun meira en þeir hafa gert.
Á blaðamannafundi sagði hann ummæli Norður-Kóreumanna þar sem þeir vísuðu hótunum Trumps til föðurhúsanna vera „vitleysu“ og sagði í framhaldinu að hann hefði kannski ekki tekið nógu sterkt til orða.
„Þeir hafa gert þjóðinni okkar þetta í langan tíma, í mörg ár,“ sagði forsetinn. „Það er kominn tími til að einhver rísi upp fyrir almenning í landinu og í öðrum löndum. Ef eitthvað er þá var þessi yfirlýsing ekki nógu harðorð.“