Heil fjölskylda dæmd fyrir þrælahald

Ellefu meðlimir sömu bresku fjölskyldunnar hafa verið sakfelldir fyrir nútíma þrælahald eftir árslöng réttarhöld í máli þeirra. Um er að ræða tíu karlmenn og eina konu, en fólkið rak fyrirtæki sem sérhæfði sig í lagfæringum á heimkeyrslum. BBC greinir frá.

Fórnarlömbin, sem störfuðu hjá fyrirtæki fjölskyldunnar, bjuggu við skelfilegar aðstæður í hjólhýsum, án rennandi vatns og salernisaðstöðu. Var þeim gert að vinna mjög langa vinnudaga, fengu lítil sem engin laun og matur var af skornum skammti. Stundum var þeim gert að borða afganga af mat fjölskyldunnar.

Fórnarlömbin voru á aldrinum 18 til 63 ára og höfðu mörg hver starfað fyrir fjölskylduna árum saman. Eitt fórnarlambanna hafði starfað fyrir fjölskylduna í 26 ár. Fyrirtækið græddi á tá og fingri og með rekstrinum fjármagnaði fjölskyldan mjög svo dýran lífsstíl sinn; ferðalög til framandi landa, lúxusbíla, fegrunaraðgerðir og dekurdaga.

Fórnarlömbin eru öll sögð hafa verið í viðkvæmri stöðu, jafnvel heimilislaus, en þau voru sótt af fjölskyldumeðlimum víða um Bretland. Var þeim aldrei gerð grein fyrir lagalegum réttindum sínum sem starfsfólki fyrirtækisins, og þrátt fyrir að þeim væri ekki haldið sem gíslum, voru þau háð þeim fjárhagslega og tilfinningalega og beitt líkamlegu ofbeldi, sem gerði flótta nánast ómögulegan.

• 1 blogg um fréttina

Bloggað um fréttina

• Helga Kristjánsdóttir: Fréttir um vonsku og hverskonar ofbeldi alltof fyrirferðamiklar.