Donald Trump Bandaríkjaforseta biðu óblíðar móttökur þegar hann kom í sína fyrstu heimsókn í íbúð sína í Trump turninum í New York í gærkvöldi. Þar höfðu um eitt þúsund mótmælendur komið saman með skilti sem meðal annars stóð á: „Ekki minn forseti“. Þetta er í fyrsta skipti sem Trump kemur í íbúð sína frá því hann sór embættiseið fyrr á árinu.
Trump ætlar að dvelja í nokkra daga á Manhattan áður en hann snýr aftur á sveitasetur sitt í Bedminster, New Jersey, þar sem hann lýkur sumarleyfi sínu.
Trump nýtur lítilla vinsælda í New York og þurfti lögregla að rýma götur í nágrenni við Turninn á Fifth Avenue svo hann kæmist heim. „Hey, hey! rasistinn Trump þarf að fara,“ sungu mótmælendur meðal annars. Eins mátti lesa áletranir eins og: FU TRUMP.
„Ekki Trump, ekki KKK, ekki fasista Bandaríki!“ sungu mótmælendur og bættu við „Ást ekki hatur. Það er það sem gerir Bandaríkin frábær!“