Tveir afsagaðir kvenmannsfætur fundust í ruslapoka í íbúðarhverfi í norðurhluta Rómaborgar að því er ítalskir fjölmiðlar greindu frá í dag.
Ung kona fann fæturna er hún var að fara í gegnum ruslatunnur í nágrenni lystigarðs í borginni í gærkvöldi.
AFP-fréttastofan segir fæturna hafa verið sagaða af við nára, en aðrir líkamshlutar hafi enn ekki fundist.
Tæknideild ítölsku lögreglunnar fer nú gegnum myndbönd úr eftirlitsmyndavélum í hverfinu í von um vísbendingar.
Þetta er ekki fyrsti fótafundurinn í borginni, en árið 2015 fannst fótleggur í ánni Tíber með húðflúri sem á stóð: „Í dag er góður dagur til að deyja“.
Fundurinn vakti mikinn óhug meðal borgarbúa, en sá fótleggur tilheyrði gallhörðum stuðningsmanni fótboltaliðsins Lazio, sem var þekktur eiturlyfjanotandi og átti sakaferil að baki.