Bauð upp 500 kíló af nashyrningshornum

Netuppboði á nashyrningshornum lauk um hádegisbil í dag en uppboðið hefur mætt harðri gagnrýni dýra- og náttúruverndarhópa. Þetta er fyrsta uppboðið í Suður-Afríku á nashyrningshornum síðan 2009 en Hæstiréttur S-Afríku heimilaði nýlega uppboð á hornunum. Boðin voru upp 264 horn sem vógu um hálft tonn.

AFP

Ekki liggja fyrir upplýsingar um þátttöku í uppboðinu en búist er við að uppboðshaldarinn sendi frá sér tilkynningu á mánudag. Þeir sem hugðust taka þátt í uppboðinu þurftu að greiða skráningargjald sem nemur um 800 þúsund krónum. Aðeins þeir sem voru skráðir gátu boðið í hornin en svartamarkaðsverð á hornunum í Asíu er á bilinu tvær og hálf milljón króna upp í sex milljónir á kílóið.

Frétt af mbl.is

Hyggst bjóða upp 500 kg af hornum

John Hume, eigandi stærsta nashyrningabúgarðs heims með 1.500 nashyrninga, skipulagði uppboðið og stefnir að því að halda annað uppboð fljótlega, ekki á netinu. Hume á um sex tonn af nashyrningshornum en hann hefur safnað þeim með því að svæfa nashyrningana og skera hornin af þeim á meðan þeir sofa. 

Að hans sögn er þetta mannúðleg leið til að safna hornunum í stað þess að veiða nashyrningana líkt og veiðiþjófar sem hafa verið mikil plága í Suður-Afríku. Um 20 þúsund nashyrningar, um 80 prósent allra nashyrninga heims, eru í Suður-Afríku en veiðiþjófar hafa fellt um 7.100 skeppur á undanförnum áratug.

Dýrverndunarsinnar telja að uppboðið leiði til aukningar í veiðiþjófnaði á nashyrningum. Fresta þurfti uppboðinu vegna mótmæla og dómsmála.

• Blogga um frétt