Færeyjar vilja fríverslun við Rússa

Færeyingar hafa unnið hörðum höndum að því að landa fríverslunarsamningi við Rússland. Poul Michelsen, utanríkisráðherra Færeyja, heimsækir Rússland í næsta mánuði og er málið á dagskrá heimsóknarinnar samkvæmt fréttavefnum Undercurrentnews.com.

Fram kemur í fréttinni að sambandið á milli Þórshafnar og Moskvu hafi verið gott um árabil. Færeyjar hafi verið fyrsta vestræna landið til þess að semja um tvíhliða fiskveiðisamning við Sovétríkin árið 1977. Síðan hafi þjóðirnar tvær unnið náið saman í sjávarútvegsmálum.

Þegar Bandaríkin, Evrópusambandið, Noregur og Ísland hafi sett viðskiptaþvinganir á Rússa vegna innlimunar þeirra á Krímskaga árið 2014 hafi Færeyingar verið ein af fáum þjóðum sem rússnesk stjórnvöld hafi ekki refsað með gagnaðgerðum á viðskiptasviðinu.

Taka ekki þátt í refsiaðgerðum gegn Rússum

Færeyingar eru ekki þátttakendur í refsiaðgerðunum gegn Rússum og fyrir vikið hefur útflutningur á sjávarfangi frá Færeyjum til Rússlands aukist stórkostlega síðustu árin samhliða því sem Rússar hafa lokað fyrir innflutning meðal annars frá Íslandi og Noregi.

Greint var frá því í vor að verðlag á færeysku sjávarfangi til Rússlands hefði lækkað í kjölfar þess að Rússar væru farnir að kaupa sjávarafurðir frá öðrum ríkjum til að fá hagstæðara verð. Eftir sem áður héldi útflutningur Færeyinga til Rússlands áfram að aukast.

Þannig hafi til að mynda árlegur útflutningur Færeyinga á makríl til Rússlands aukist um 215% frá árinu 2013 og á ferskum laxi um 612%. Færeyingar hafa reynt að gera lítið úr áhrifum viðskiptaþvingananna og sagt ástæðuna öfluga markaðssetningu um árabil.

Fríverslunarviðræður EFTA og Rússa á ís

Fríverslunarsamtök Evrópu (EFTA), sem Ísland er aðili að, áttu í fríverslunarviðræðum við Rússland þegar innlimun Krímskaga átti sér stað og fóru viðræðurnar á ís í kjölfarið samkvæmt ákvörðun samtakanna. Viðræðurnar hafa ekki verið teknar upp aftur síðan.

Færeyingar stefna einnig að því að semja um fríverslun við Kína og tilkynnt var í dag að gengið hafi verið frá fríverslunarsamningi á milli Færeyja og Tyrklands.

• 2 blogg um fréttina

Bloggað um fréttina

• Jónatan Karlsson: Tímabært að fara að vakna.
• Ómar Ragnarsson: Eru Færeyingar sjálfstæðari en við?