Theresa May, forsætisráðherra Bretlands og formaður Íhaldsflokksins, vill halda áfram að leiða flokkinn í næstu þingkosningum. „Ég er í þessu til lengri tíma,“ sagði hún í samtali við Sky-fréttastofuna.
Sagðist hún vilja halda áfram til lengri tíma þar sem Bretar stæðu frammi fyrir langtímaáskorun með Brexit. „Við þurfum að vinna Brexit-samninginn rétt, til að veita fólkinu í Bretlandi góðan samning.“
Sagði hún að jafnframt þyrfti að ganga úr skugga um það að eftir að Bretland gengur úr Evrópusambandinu haldi Bretar áfram að eiga viðskipti við lönd um allan heim og „standa uppréttir“.
Spurð um það hvort hún vildi taka þátt í næstu þingkosningum fyrir hönd Íhaldsflokksins svaraði May játandi. Áður höfðu borist fréttir um að dagar May í embætti yrðu fljótt taldir, en May blés á það.
Eftir að tilraun May, til að styrkja umboð sitt til að semja um útgöngu Breta úr Evrópusambandinu, mistókst hafa sumir af ráðherrum flokksins verið ófeimnir við að tjá sig opinberlega um andstöðu sína við Brexit og útgjöld ríkisins. Hafa sumir þeirra sagst búast við að dagar May í embætti verði fljótt taldir.