Meðal fjögurra meintra meðlima breskrar nýnasistahreyfingar, sem handteknir voru í dag vegna gruns um hryðjuverkastarfsemi, eru hermenn. Þeir eru starfandi í breska hernum, að því er varnamálaráðuneytið segir.
„Við getum staðfest að starfandi hermenn hafa verið handteknir á grundvelli hryðjuverkalaga fyrir að tengjast hægri öfgahópi,“ segir í yfirlýsingu ráðuneytisins.
Hreyfingin kallar sig National Action og var fyrsta rasistahreyfingin sem ríkisstjórn Bretlands setti á bannlista í desember á síðasta ári, hálfu ári eftir að þingkonan Jo Cox var myrt af hægri öfgamanni.
Í yfirlýsingu frá lögreglunni segir að fjórmenningarnir séu í haldi grunaðir um að hafa lagt á ráðin um hryðjuverk.
Nöfn fólksins hafa ekki verið gefin upp en það er sagt á aldrinum 22-32 ára og vera frá Birmingham, Ipswich og Northampton á Englandi og Powys í Wales.
Lögreglan segir að handtakan hafi verið gerð í kjölfar rannsóknar en að öryggi almennings hafi ekki verið ógnað.
Fólkið var handtekið í kjölfar húsleita sem gerðar voru á nokkrum stöðum.
Cox var þingmaður Verkamannaflokksins. Hún var skotin og stungin til bana í júní í fyrra. Árásarmaðurinn heitir Thomas Mair og er yfirlýstur hægri öfgamaður. Hann hrópaði: „Bretland fyrst!“ áður en hann myrti hana.
Nýnasistahreyfingin National Action fagnaði árás Mairs. Starfsemi hennar var bönnuð í desember.