Hjálparsamtök sem aðstoða Rohingja-fólk í flóttamannabúðum í Bangladess þurfa bráðnauðsynlega að fá 77 milljónir dala til hjálparstarfs, að sögn Sameinuðu þjóðanna. Rohingjar hafa flúið ofsóknir í Rakhine-ríki í Mjanmar undanfarið. Talið er að um 290 þúsund Rohingja hafi flúið til Bangladess frá 25 ágúst síðastliðnum. BBC greinir frá.
Gríðarleg þörf er að mat, drykk og heilbrigðisþjónustu í flóttamannabúðunum Cox's Bazaar. Fólkið á flótta sakar stjórnarher Mjanmar um að brenna þorp sín en herinn þvertekur fyrir það. Stjórnvöld í Mjanmar segjast eingöngu berjast gegn „hryðjuverkamönnum“ úr röðum Rohingja.
Ríkið er eitt fátækasta svæði Mjanmar og á landamæri að Bangladess. Þar hefur ólga milli múslima og búddista verið viðvarandi árum saman og þar eru Rohingjar neyddir til að hafast við. Þeir hafa ekki ferðafrelsi og borgaraleg réttindi þeirra eru að öðru leyti einnig skert.