Tæplega 400 þúsund heimili á Flórída í Bandaríkjunum eru orðin rafmagnslaus og fellibylurinn Irma nálgast óðfluga. Irma er aftur orðin fjórða stigs fellibylur. Auga stormsins eða kraftmesti hluti fellibyljarins er kominn „mjög nálægt“ neðrihluta Florida Keys-eyjaklasann, sem er syðst við Flórída. Eftir það stormar hún yfir vesturströnd ríkisins. NBC greinir frá.
Klukkan er að verða sjö að morgni að staðartíma í Florida. Sérfræðingur hjá bandarísku fellibyljamiðstöðinni reiknar með að klukkan níu að staðartíma skelli Irma á fullum þunga á Keys-eyjaklasann. Sólarhring síðar eða á mánudaginn verður kraftur Irmu kominn niður í þriðja stig þegar hún þokar sér upp vesturhluta ríkisins. Þetta kemur frá CNN.
Bálhvasst er þegar orðið í Florida og hefur vatnsyfirborð hækkað talsvert. Það er orðið of seint fyrir fólk að komast í öruggt í skjól, að sögn ríkisstjóra.
Eyjarnar í Karíbahafi eru gjörónýtar. Frönsk stjórnvöld segja 95% eyjarinnar St. Martin sé gjörónýt. Emmanuel Macron, forseti Frakklands, var með neyðarfund á laugardaginn þar sem áætlun um björgunaraðgerðir og uppbygginu á eyjunni var kortlagt.
Að minnsta kosti 24 hafa látist af völdum fellibyljarins sem hefur gengið yfir eyjar í Karíbahafi, að því er segir á vef BBC. Óttast er að tala látinna eigi eftir að hækka meðal annars á eyjunum í Karíbahafi.