Erlent | mbl | 11.9.2017 | 9:23

„Skólabókadæmi um þjóðernishreinsanir“

Íbúar Bangladess hjálpa hér Rohingja-múslimum að komast frá borði báts sem þeir flúðu á frá Búrma. AFP

Aðgerðir stjórnvalda í Búrma gegn Rohingja-múslimum eru „skólabókadæmi um þjóðernishreinsanir“ að sögn Zeid Raad Al Hussein mannréttindastjóri Sameinuðu þjóðanna. Hvatti Zeid yfirvöld í Búrma til að binda endi á hernaðaraðgerðir sínar í Rakhine fylki. Rúmlega 300.000 Rohingjar hafa flúið yfir til Bangladess eftir að til átaka kom í Rakine-héraði í síðasta mánuði.

Þá hefur Dalai Lama biðlað til Aung San Suu Kyi, leiðtoga Búrma, að hún finni friðsamlega lausn á deilunni.

Búrmíski herinn segist vera að bregðast við árásum uppreisnarmanna Rohingja og neitar því alfarið að almennir borgarar verði fyrir árásum þeirra. Átökin hófust þegar uppreisnarmenn Rohingja réðust á lögreglustöð í norðurhluta Rakhine og myrtu 12 öryggisverði.

Þeir Rohingjar sem hafa flúið frá Búrma eftir að átökin hófust, segja herinn hafa brugðist harkalega við meðal annars með því að kveikja í þorpum og ráðast á almenna borgara til að hrekja þá á brott.

Barn Rohingja-múslima sefur eftir að komast yfir landamærin til Bangladess. Um 300.000 manns hafa flúið frá Búrma til Bangladess undanfarið. AFP

Drepnir án dóms og laga

Rakhine-ríki í vesturhluta Búrma er eitt fátækasta svæði Búrma og á landamæri að Bangladess. Þar hefur ólga milli múslima og búddista verið viðvarandi árum saman og þar eru Rohingjar neyddir til að hafast við. Þeir hafa ekki ferðafrelsi og borgaraleg réttindi þeirra eru að öðru leyti einnig skert.

Sagði Zeid hörku aðgerða hersins ekki vera í samræmi við ástand mála. „Við höfum fengið fjölda fregna og ljósmyndir úr gervihnöttum sem sýna öryggissveitir og uppreisnarsveitir brenna þorp Rohingja og standa fyrir drápum án dóms og laga, meðal annars með því að skjóta á almenna borgara þar sem þeir flýja,“ sagði hann.

„Ég hvet stjórnina til að binda endi á þessa grimmilegu hernaðaraðgjörð og axla ábyrgð á öllum þeim brotum sem hafa átt sér stað og snúa þannig við alvarlegri og útbreiddri mismunun í garð Rohingja.“

BBC segja hjálparstofnanir nú telja um 313.000 Rohingja hafa flúið til Bangladess og að þeir þurfi á mikilli aðstoð að halda, þar sem hjálparstarf sé nú af skornum skammti.