15 ára drengur missti báða fætur er hann steig á jarðsprengju á flótta sínum frá Búrma. Kona sem nú dvelur á sama spítala segist einnig hafa stigið á jarðsprengju er hún flúði skothríð hermanna stjórnarhers Búrma. Fréttamaður BBC ræddi við Rohingja-múslima, sem nú dvelja í Bangladess og eru örkumla eftir að hafa stigið á jarðsprengjur á flóttanum til Bangladess.
Mannréttindasamtökin Amnesty International sökuðu í gær yfirvöld í Búrma um að koma jarðsprengjum fyrir á landamærum ríkjanna og stjórnvöld í Bangladess hafa áður komið með sambærilega ásökun. Fjöldinn allur af sprengjum voru grafnar í jörðu á landamærum ríkjanna á tíunda áratug síðustu aldar, en heimildamenn BBC í Bangladess segja stjórnarherinn nýlega hafa bætt þar við nýjum sprengjum. Yfirvöld í Búrma hafna slíkum ásökunum alfarið.
Rúmlega 300.000 Rohingjar hafa nú flúið hernaðaraðgerðir stjórnarhersins í Rakhine fylki eftir að til átaka kom þar í síðasta mánuði. Zeid Raad al-Hussein, mannréttindastjóri Sameinuðu þjóðanna, sagði í gær aðgerðir stjórnarhersins vera skólabókadæmi um þjóðernishreinsanir.
Rohingjar eru minnihlutahópur múslima sem búa í Rakhine-ríki í vesturhluta Búrma. Það er eitt fátækasta svæði Búrma og á landamæri að Bangladess. Þar hefur ólga milli múslima og búddista verið viðvarandi árum saman og þar eru Rohingjar neyddir til að hafast við. Þeir hafa ekki ferðafrelsi og borgaraleg réttindi þeirra eru að öðru leyti einnig skert.
Aung San Suu Kyi, leiðtogi Búrma, sætir nú vaxandi gagnrýni alþjóðasamfélagsins fyrir að gera ekkert í málinu .
Hinn 15 ára gamli Azizu Haque er einn þeirra sem steig á jarðsprengju. Hann missti báða fætur og dvelur nú á sjúkrahúsi í Bangladess. Móðir hans segir bróður hans liggja á öðru sjúkrahúsi í landinu með svipuð meiðsl.
Sabequr Nahar særðist einnig þegar hún flúði Búrma. Hún var að flýja með þremur sonum sínum þegar hún steig á jarðsprengju. Nahar segir herinn hafa ráðist gegn þorpi hennar.