Ósáttir við val fyrsta kvenforsetans

Halimah Yacob verður næsti forseti Singapúr og fyrsta konan til að gegna embættinu. Val hennar hefur þó vakið töluverða reiði í landinu þar sem engar kosningar munu fara fram. Úrskurðuðu yfirvöld að mótframbjóðendur Yacob mættu ekki ströngum viðmiðum ríkisins um kjörgengi.

Guardian segir Yacob vera dyggan stuðningsmann stjórnvalda en hún hefur gegnt embætti þingforseta og tilheyrir minnihlutahópi malasískra múslima í landinu. 

Þetta er ekki í fyrsta skipti sem stjórnvöld í landinu hafa úrskurðað forsetaframbjóðendur óhæfa til að gegna embættinu og þar með gert forsetakosningar ónauðsynlegar.

Sami stjórnmálaflokkurinn hefur verið við völd í Singapúr í áratugi.

• Blogga um frétt