Sýrlenska lýðræðissveitin (SDF), er nýtur stuðnings Bandaríkjamanna og berst gegn hryðjuverkasamtökunum Ríki íslams, sakar Rússa um að hafa varpað sprengjum á hermenn sína í dag. Rússar neita þessum ásökunum.
Þetta er í fyrsta sinn sem SDF, sem er bandalag araba og Kúrda, segist hafa verið skotmark Rússa. Bæði SDF og stjórnarher Sýrlands sækja á sama tíma að hinu svokallaða Ríki íslams í austurhluta Deir Ezzor-umdæmis, en í sitt hvoru lagi. Svæðið er ríkt af olíu og því hernaðarlega mikilvægt.
„Klukkan 3:30 (00:30 að íslenskum tíma) þann 16. september 2017 urðu hersveitir okkar austur af Efrat-ánni skotmark herflugvéla Rússa og stjórnarhers Sýrlands á Al-Sinaaiya-svæðinu,“ segir í tilkynningu frá SDF. Þá segir að sex hermenn hafi slasast.
Rússar neita þessum ásökunum alfarið. „Það er ekki mögulegt, hvers vegna ættum við að varpa sprengjum á þá?“ Segir Igor Konashenkov, talsmaður rússneska hersins, við fréttastofu AFP.
Hersveitir SDF í Deir Ezzor og Raqa, sem berjast gegn vígamönnum hryðjuverkasamtakanna Ríki íslams, njóta stuðnings Bandaríkjamanna á meðan Rússar verja hermenn sýrlenska stjórnarhersins úr lofti.
Stríðið átakanlega í Sýrlandi, sem í upphafi voru friðsöm mótmæli almennra borgara árið 2011, hefur þróast út í það að vera orðið gríðarlega flókið stríð þar sem margir mismunandi aðilar eiga hlut að máli. Yfir 330.000 hafa látið lífið og milljónir misst heimili sín.