Donald Trump Bandaríkjaforseti og Xi Jinping, forseti Kína, eru sammála því að „hámarka þrýsting sinn á Norður-Kóreu”.
Hvíta húsið greindi frá þessu. Spennan á Kóreuskaganum hefur aukist mikið að undanförnu vegna eldflauga- og kjarnorkutilrauna norðurkóreskra stjórnvalda.
Leiðtogarnir tveir ræddu saman í síma um sífelldar ögranir Norður-Kóreu gagnvart alþjóðasamfélaginu og leiðir til að koma stöðugleika á í norðausturhluta Asíu.
„Leiðtogarnir tveir voru sammála um að hámarka þrýsting sinn á Norður-Kóreu með því að fylgja samþykktum öryggisráðs Sameinuðu þjóðanna eftir á kröftugan hátt.”
Stjórnvöld í Norður-Kóreu hafa varað við því að hertar refsiaðgerðir og þrýstingur af hálfu alþjóðasamfélagsins muni aðeins verða til þess að þau muni leggja aukinn þunga í þróun kjarnorkuáætlunar sinnar.