Andstæðingar Rodrigo Duterte, forseta Filippseyja, hafa komið sér upp formlegri kveðju sem tákn um mótspyrnu við stjórnarháttum Duterte og umdeildu stríði hans gegn fíkniefnum.

Kveðjan á rætur sínar að rekja til þríleiksins um Hungurleikanna eftir Suzanne Collins og aðalpersónu bókanna, Katniss Everdeen, og felst í að lyfta þremur fingrum upp í loft. Kveðjan er jafnframt sett til mótvægis við kveðju sem Duterte notar ítrekað þegar hann setur krepptan hnefa á loft í augnhæð, sem þykir minna óþægilega mikið á kveðju nasista.

Fjöldi andstæðinga Duterte kom saman í gær og flutti kveðjuna samhuga. Tilefnið var tilkynning á fyrirhuguðum mótmælafundi á fimmtudag þar sem „slóð forsetans sem er uppfull af ofbeldi, hatri og lítilsvirðingu laganna“ verður mótmælt.

Þúsund­ir hafa lát­ist frá því að Duterte lýsti yfir um­deildu stríði gegn fíkni­efn­um í fyrra. Herferð for­set­ans er ætlað að þurrka með öllu út fíkni­efnaviðskipti í land­inu. Hún hef­ur hins veg­ar verið harðlega gagn­rýnd af mann­rétt­inda­sam­tök­um og alþjóðasam­fé­lag­inu vegna fjölda dauðsfalla.

„Já, við höfum tekið upp „þriggja-fingra-kveðjuna“ sem tákn um mótstöðu, rétt eins og í þríleiknum um Hungurleikana,“ segir þingmaðurinn Gary Alejano í samtali við AFP-fréttastofuna.

Með því að taka upp kveðjuna vilja andstæðingar Duterte meðal annars ná til ungs fólks.

Kveðjur af þessu tagi og önnur tjáning með höndum eru þekkt pólitísk tákn á Filippseyjum. „L-táknið“ var til að mynda notað meðal aðgerðasinna á 9. áratugnum til að sýna mótstöðu við einræðisstjórn Ferdinand Marcos sem steypt var af stóli með byltingu árið 1986.

Andstaða við fíkni­efna­stríðið hef­ur verið lít­il inn­an­lands, þar til nú. Vendipunkturinn er talinn vera morð á hinum 17 ára gamla Kian de­los Santos, sem var skot­inn í höfuðið af lög­reglu­mönn­um og skil­inn eft­ir hjá svínastíu.

Tengdar fréttir

Duterte og fíkniefnastríð á Filippseyjum

Skýrslan sýni brýna þörf á alþjóðlegri rannsókn

• Reynt að þagga niður í Ressa
• Mannréttindi fótum troðin á Filippseyjum
• Skjótið vandræðagemsana
• „Handtakið tíkina“

» Fleiri tengdar fréttir

• Blogga um frétt