Joe & The Juice í Ósló lokað vegna salmonellu

Danski matsölustaðurinn Joe & The Juice hefur lokað útibúi sínu á Gardermoen-flugvellinum í Ósló tímabundið eftir að upp komst um salmonellusmit. Aftenposten greinir frá. Á fimmtudag var greint frá því að átta tilfelli hefðu komið upp á stuttum tíma. Hin sýktu voru á aldrinum 19 til 60 ára og bjuggu víðsvegar um Noreg, einn til að mynda í Finnmörku nyrst í Noregi og annar í Ósló. DNA-snið bakteríunnar er þekkt en hafði aldrei fundist áður í Noregi og því talið víst að atvikin væru skyld.

Nú hefur komið á daginn að í það minnsta sjö þeirra sýktu hefðu farið um Gardemoen-völl og neytt matar hjá Joe & The Juice. Að sögn ráðgjafa hjá Matvælastofnun Noregs er óvíst hvort ógætileg meðferð matvæla hafi valdið smiti eða hvort staðurinn hafi notað hráefni sem þegar voru smituð. Kjúklingasamlokur eru einn vinsælasti réttur staðarins.

Joe & The Juice hefur upplýst að þau noti sama hráefni í alla sína 32 matsölustaði í Noregi. Engin tilfelli hafa þó komið upp utan flugvallarins. Hefur matsölustaðnum á flugvellinum því verið lokað og starfsmenn sendir í launað leyfi.

• Blogga um frétt