Erlent | mbl | 2.10.2017 | 12:33 | Uppfært 13:04

Árásarmaðurinn er afi á sjötugsaldri

Stephen Paddock, afi á sjötugsaldri, skaut yfir fimmtíu manns til bana og særði yfir 200 í Las Vegas. Ekkert hefur komið fram sem tengir hann við hryðjuverkasamtök en átta rifflar fundust í herbergi hans á hótelinu þar sem hann framdi fjöldamorðin - hryðjuverkið. Alls leituðu yfir 400 manns á sjúkrahús í kjölfar árásarinnar.

Fjölmiðlar víða um heim reyna að draga upp mynd af Stephen Paddock sem skráði sig á spjöld sögunnar í nótt með ódæðisverki sínu. Skotárás sem er sú mannskæðasta í Bandaríkjunum hingað til.

Stephen Paddock ásamt Marilou Danley, Skjáskot af Twitter

Paddock var 64 ára gamall og frá Nevada. Hann var skotinn til bana af sérsveitarmönnum í herbergi sínu á 32. hæð Mandalay Bay hótelsins og spilavítisins.

Samkvæmt Telegraph bjó Paddock í þorpi fyrir lífeyrisþega í Mesquite, Nevada, frá því í júní í fyrra. Hann er fæddur 9. apríl 1953. Hann bjó áður í Reno, Nevada (2011-2016) og eins um tíma í Melbourne, Flórída og víðar í Nevada og Kaliforníu í gegnum tíðina.

Mesquite er í um það bil 130 km fjarlægð frá Las Vegas og er við ríkjamörk Arizona. Alls búa 17.400 í Maequite.

Lögreglustjórinn í Las Vegas segir að allt bendi til þess að Paddock hafi verið einn að verki en sambýliskona hans, Marilou Danley, var með honum á hótelinu. Hún er í haldi lögreglu en ekki talin tengjast árásinni.

Ekki er vitað hvað Paddock gekk til þegar hann hóf skothríð á gesti á útitónleikum úr herbergi sínu á 32. hæð hótelsins.

NBC segir að Paddock hafi verið á sakaskrá en ekki hefur tekist að sannreyna það. Lögreglan í Mesquite segir í samtali við CBS News að hún hafi aldrei haft afskipti af honum. Hann búi í hverfi eldri borgara og sé ekki fyrrverandi hermaður.

Danley er 62 ára gömul og er frá Ástralíu. Hún og Paddock hafa verið skráð með sama heimilisfang í opinberum skrám frá því í janúar. Á LinkedIn lýsir hún sér sem sérfræðing á sviði veðmála og spilavíta. Á Facebook segist hún vera stolt móðir og amma sem lífinu til fulls.